ABŞ-ın “Information Technology and Innovation Foundation” analitik mərkəzinin mütəxəssisləri süni intellekt sahəsində lider dövlətlərlə bağlı tədqiqat aparıblar. Nəticələrə görə, ABŞ süni intellektin hazırlanması və istifadəsi sahələrində aparıcı ölkə olduğu halda Çin bu fərqi sürətlə azaldır, Avropa İttifaqı (Aİ) isə geri qalır.

Securitylab.ru saytı xəbər verir ki, tədqiqatda əsas diqqət süni intellektin altı kateqoriyası (istedad, tədqiqat, işləmələr, tətbiq, məlumatlar və avadanlıq) üzrə 30 göstəriciyə yönəldilib. ABŞ yüz ballıq şkala əsasında 44,2 bal toplayıb, Çin 32,3 balla ikinci, Avropa İttifaqı isə 23,5 balla üçüncü yeri tutub.

Məlum olub ki, ABŞ startaplara investisiyalar, tədqiqat və işləmələrin maliyyələşdirilməsi kimi əsas sahələrdə liderdir. Çin isə bir neçə sahədə uğur qazanıb və digər ölkələrlə müqayisədə, məhsuldarlığa görə dünyanın 500 ən güclü superkompüteri sırasına daxil olan daha çox superkompüter sayına malikdir. Çində bu göstərici 214, ABŞ-da 113, Aİ-də 91 təşkil edir.

Ekspertlərin sözlərinə görə, Çinin süni intellekt imkanları Aİ və ABŞ ilə müqayisədə, bir neçə istiqamət üzrə artıb. Birincisi, Çin 2018-ci ildə süni intellekt üzrə 24 929 tədqiqat işi dərc edərək Aİ-ni süni intellekt nəşrləri üzrə dünya lideri kimi üstələyib. Aİ-də bu göstərici 20 418, ABŞ-da 16 233 təşkil edir. İkincisi, süni intellekt sahəsində tədqiqatların keyfiyyəti ümumilikdə ildən-ilə artır. Üçüncüsü, proqram təminatı və kompüter xidmətləri təqdim edən şirkətlər elmi tədqiqat və təcrübi-konstruktor işləri üçün xərcləri artırıblar.